سری نگر : آج مقبوضہ کشمیر، بھارت اور بنگلہ دیش سمیت دیگر ممالک میں بھی عیدالفطر کی خوشیاں منائی جا رہی ہیں۔ دلی کی جامع مسجد میں نماز عید کا بڑا اجتماع ہوا، جبکہ ممبئی اور بھوپال میں بھی عید الفطر کے اجتماعات منعقد ہوئے۔
آسٹریلیا، انڈونیشیا، ملائیشیا، افغانستان، شام، مسقط، ایران، عراق، عمان اور اردن میں بھی عیدالفطر منائی جا رہی ہے۔ اس کے علاوہ، برونائی، نائیجیریا، فلپائن اور جاپان میں بھی عید الفطر کے بڑے اجتماعات ہوئے، جہاں مسلمان اپنے پیاروں کے ساتھ عید کی خوشیوں کا آغاز کر رہے ہیں۔
دوسری جانب سعودی عرب، متحدہ عرب امارات، قطر اور فلسطین میں اتوار کو عید منائی گئی۔ مسجد الحرام اور مسجد نبویﷺ میں نماز عید کے بڑے اجتماعات ہوئے، جن میں لاکھوں افراد نے شرکت کی اور اللہ کی بارگاہ میں عبادات کی۔