ملک کے مختلف شہروں میں بارش اور برفباری کی توقع

لاہور : محکمہ موسمیات نے آئندہ چند دنوں کے دوران مری سمیت مختلف شہروں میں بارش اور برفباری کی پیشگوئی کی ہے۔ ملک کے بیشتر میدانی علاقوں میں موسم سرد اور خشک رہنے کا امکان ہے، تاہم بالائی خیبر پختونخوا، گلگت بلتستان، کشمیر اور ملحقہ پہاڑی علاقوں میں جزوی طور پر ابر آلود موسم کے ساتھ ہلکی بارش اور پہاڑوں پر ہلکی برفباری ہو سکتی ہے۔

اسلام آباد اور اس کے نواحی علاقوں میں بھی موسم سرد اور جزوی ابر آلود رہنے کی توقع ہے۔ پنجاب کے بیشتر اضلاع میں سرد اور خشک موسم برقرار رہے گا، جبکہ مری، گلیات اور گرد و نواح میں ہلکی بارش اور برفباری کا امکان ہے۔

دیر، چترال، کوہستان، مانسہرہ، ایبٹ آباد، بٹگرام، شانگلہ، بونیر اور سوات میں بھی چند مقامات پر بارش اور پہاڑوں پر ہلکی برفباری متوقع ہے۔ کشمیر اور گلگت بلتستان میں بھی ہلکی بارش اور برفباری ہو سکتی ہے۔ سندھ اور بلوچستان کے بیشتر اضلاع میں موسم سرد اور خشک رہنے کے علاوہ شمالی اضلاع میں شدید سردی کی توقع کی جا رہی ہے۔