کراچی :کراچی کے علاقے بغدادی میں پولیس نے ایک اہم کارروائی کے دوران گینگ وار کے کارندے فرحان عرف خلیفہ کو بھتہ لیتے ہوئے رنگے ہاتھوں پکڑ لیا ہے۔ ترجمان ڈسٹرکٹ سٹی پولیس کے مطابق، ملزم لیاری کے جھینگو گروپ سے تعلق رکھتا ہے اور بیکری کے مالک سے بھتہ طلب کرنے کے دوران پولیس کی کارروائی کا نشانہ بنا۔
پولیس نے بتایا کہ فرحان عرف خلیفہ اپنے قبضے میں اسلحہ اور گولیاں رکھتے ہوئے ایک بیکری کے مالک سے بھتہ مانگ رہا تھا کہ اسی دوران علاقے میں گشت پر موجود پولیس کی ٹیم موقع پر پہنچ گئی۔ ملزم نے فرار ہونے کی کوشش کی تاہم پولیس نے تعاقب کر کے اسے گرفتار کرلیا۔
پولیس کے مطابق، فرحان عرف خلیفہ کا سابقہ کرمنل ریکارڈ بھی موجود ہے، جس میں 5 بار بغدادی اور 3 بار کلاکوٹ پولیس کے ہاتھوں مختلف مقدمات شامل ہیں، جن میں قتل، اقدام قتل، اور منشیات سمےت کئی دفعات شامل ہیں۔ حالیہ سال 2023 میں 6 جبکہ سال 2024 میں 2 مقدمات درج ہیں۔
گرفتار شدہ ملزم کو مزید تفتیش کے لیے انویسٹی گیشن پولیس کے حوالے کردیا گیا ہے۔ یہ کارروائی شہر میں بھتہ خوری کے خلاف پولیس کی جاری کوششوں کا حصہ ہے۔