لاہور: لاہور میں نئے سال کی آمد کے موقع پر آتشبازی پر مکمل پابندی عائد کر دی گئی ہے۔ انوائرمنٹ پروٹیکشن ایجنسی نے اس پابندی کا باقاعدہ نوٹیفکیشن جاری کیا ہے۔
ڈپٹی کمشنر لاہور سید موسیٰ رضا نے کہا کہ "نئے سال کی رات آتشبازی پر مکمل پابندی ہوگی، اور خلاف ورزی کرنے والوں کے خلاف سخت قانونی کارروائی کی جائے گی۔" انہوں نے مزید وضاحت دیتے ہوئے کہا کہ "فضائی آلودگی اور سموگ کے بڑھتے ہوئے خطرات کے پیش نظر یہ فیصلہ کیا گیا ہے تاکہ شہریوں کی صحت کو نقصان نہ پہنچے۔"
سید موسیٰ رضا نے شہریوں سے درخواست کی کہ "ضلعی انتظامیہ سموگ کی روک تھام کے لیے بھرپور اقدامات کر رہی ہے، اور شہریوں کو اس میں تعاون کرنا چاہیے۔" انہوں نے خاص طور پر بچوں، بزرگوں اور بیمار افراد کو سموگ کے مضر اثرات سے بچانے کی تاکید کی اور کہا کہ "صحت کا تحفظ ہماری اولین ترجیح ہے۔"
ڈپٹی کمشنر لاہور نے مزید کہا کہ "فضائی آلودگی صحت کے مسائل کا سبب بن سکتی ہے، اس لیے لاہور میں صاف اور صحت مند ماحول کے لیے انتظامیہ کی جانب سے سخت اقدامات کیے جا رہے ہیں تاکہ شہر کے شہری محفوظ رہیں۔"
