لاہور : محکمہ موسمیات نے آج ملک کے مختلف علاقوں میں موسم کی پیشگوئی کی ہے۔ ملک کے بیشتر حصوں میں موسم سرد اور خشک رہنے کا امکان ہے، جبکہ پہاڑی علاقوں میں شدید سردی اور جزوی ابر آلود موسم کی توقع ہے۔
پنجاب، خیبر پختونخوا کے میدانی علاقوں اور بالائی سندھ میں رات کے اوقات میں دھند کا سامنا ہو سکتا ہے، جو درمیانی سے شدید ہو سکتی ہے۔ اسلام آباد اور گرد و نواح میں موسم سرد اور خشک رہے گا، جبکہ بلوچستان کے بیشتر علاقوں میں بھی سرد اور خشک موسم رہے گا۔ تاہم، بلوچستان کے پہاڑی علاقوں میں رات کے اوقات میں شدید سردی اور ہلکی بارش یا برفباری کی توقع ہے۔
پنجاب کے بیشتر اضلاع میں موسم سرد اور خشک رہنے کا امکان ہے، اور مری، گلیات جیسے پہاڑی علاقوں میں شدید سردی کی توقع ہے۔ رات کے اوقات میں سیالکوٹ، نارووال، گوجرانوالہ، لاہور، راولپنڈی اور دیگر کئی شہروں میں دھند چھا سکتی ہے۔ سندھ کے بیشتر اضلاع میں بھی موسم سرد اور خشک رہنے کی پیشگوئی کی گئی ہے، لیکن رات کے وقت سکھر، شکارپور، خیر پور جیسے علاقوں میں شدید دھند چھا سکتی ہے۔
خیبر پختونخوا کے میدانی علاقوں میں موسم سرد اور خشک رہے گا، جب کہ پہاڑی علاقوں میں شدید سردی اور جزوی ابر آلود موسم رہنے کی توقع ہے۔ رات کے وقت پشاور، مردان، بنوں جیسے علاقوں میں ہلکی دھند پڑنے کا امکان ہے۔ کشمیر میں موسم شدید سرد اور خشک رہے گا، اور گلگت بلتستان میں بھی موسم شدید سرد رہنے کے علاوہ ہلکی بارش اور برفباری کی توقع ہے۔ محکمہ موسمیات نے شہریوں کو دھند اور سرد موسم سے احتیاط برتنے کی ہدایت کی ہے۔
