لاہور:پنجاب میں 9 مئی کیسز کے ججز سمیت 48 ججز کے تبادلے ہوئے ہیں۔
سانحہ 9 مئی کے کیسوں کی سماعت کرنے والے راولپنڈی، لاہور، سرگودھا اور گوجرانولہ کے ججز کو بھی تبدیل کردیا گیا ۔پراسیکیوٹرز کا موقف تھا کہ ان ججز کا سانحہ 9 مئی کے ملزمان کی طرف جھکاؤ ہے۔ انسداد دہشت گردی عدالتوں میں نئے ججز کی تعیناتیاں نہیں کی گئیں۔
چیف جسٹس لاہور ہائیکورٹ عالیہ نیلم کی منظوری سے جاری نوٹیفکیشن کے مطابق اے ٹی سی لاہور میں 9 مئی کیسز کی سماعت کرنے والے جج خالد ارشد کا تبادلہ کیا گیا ہے اور انہیں فوری طور پر لاہور ہائیکورٹ رپورٹ کرنے کا حکم دیا گیا ہے۔
راولپنڈی میں 9 مئی مقدمات کی سماعت کرنے والے جج کو بھی عہدے سے ہٹا دیا گیا، جج اعجاز آصف کو بھی فوری لاہور ہائیکورٹ رپورٹ کرنے کا حکم جاری کیا گیا ہے۔
نسیم ورک کو سیشن جج لاہور تعینات کردیا گیا، سیشن میانوالی جج قیصر بٹ کو لاہور ہائیکورٹ رپورٹ کرنے کا حکم دیا گیا، سیشن جج راجہ غضنفر علی کو جہلم سے اوکاڑہ ٹرانسفر کردیا گیا۔ڈی جی ڈسٹرکٹ جوڈیشری سرفراز اختر کو سیشن جج بہاولپور تعینات کردیا گیا۔
اینٹی کرپشن جج لاہور ارشد حسین بھٹہ کو بھی تبدیل کر دیا گیا اور انہیں فوری لاہور ہائیکورٹ رپورٹ کرنے کا حکم دیا گیا۔
جج ارشد بھٹہ پرویزالہیٰ سمیت دیگر کے خلاف کرپشن کیسز کی سماعت کر رہے تھے۔
