لاہور: وزیر اعلیٰ پنجاب مریم نواز نے لاہور میں نواز شریف کینسر ہسپتال کا سنگ بنیاد رکھا۔ تقریب سے خطاب کرتے ہوئے انہوں نے کہا کہ یہ ہسپتال پورے پاکستان میں کسی حکومت کا پہلا کینسر ہسپتال ہے، اور آج ہمارا ایک خواب حقیقت بننے جا رہا ہے۔
مریم نواز نے اس عزم کا اظہار کیا کہ ہسپتال میں کسی مریض کو علاج سے انکار نہیں کیا جائے گا، اور یہ محض ایک عمارت نہیں بلکہ لاکھوں زندگیوں کا سہارا ہے۔ ہسپتال 920 بیڈز پر مشتمل ہوگا، اور اس کی تعمیر کا منصوبہ تقریباً 55 ارب روپے کا ہے۔
وزیر اعلیٰ نے کہا کہ کینسر کا علاج مہنگا ہے، اور وہ عوام کی خدمت کے لیے ہمیشہ کوشاں رہیں گی۔ انہوں نے وضاحت کی کہ نواز شریف، شہباز شریف اور ان کی اپنی ترجیحات ہمیشہ عوام کی فلاح و بہبود رہی ہیں۔
نواز شریف کینسر ہسپتال کی تعمیر دو مراحل میں کی جائے گی، جس میں پہلا مرحلہ 2025 میں مکمل ہونے کی توقع ہے۔ مریم نواز نے ہدایات دیں کہ پہلے مرحلے کو 12 ماہ کے اندر فعال کیا جائے۔
انہوں نے مزید کہا کہ کینسر کے آخری مرحلے کے مریضوں کو بھی ہسپتال میں داخل کیا جائے گا، اور لواحقین کی رہائش کے لیے بھی مناسب سہولیات فراہم کی جائیں گی۔
آخر میں، وزیر اعلیٰ نے ملک میں ڈاکٹروں کی واپسی کے لیے اسکیمات متعارف کرانے کا وعدہ کیا، جس میں مفت رہائش اور گاڑیاں فراہم کرنے کی تجویز بھی شامل ہے۔