سموگ میں اضافہ، لاہور کے کچھ علاقوں میں گرین لاک ڈاؤن لگا دیاگیا

لاہور:ادارہ ماحولیات پنجاب نے لاہور میں گرین لاک ڈاؤن لگا دیا۔ ڈیوس روڈ ، ایجرٹن روڈ ، ڈیورنڈ روڈ اور کشمیر روڈ ہاٹ سپاٹ ایریا میں شامل  ہیں۔
اس کے علاوہ   شملہ پہاڑی سے گلستان سینما اور ایبٹ روڈ بھی ہاٹ سپاٹ ایریا میں شامل ہے۔ شملہ پہاڑی سے ریلوے سٹیشن اور ایمپریس روڈ بھی ہاٹ سپاٹ ایریا ڈکلیئر کردئیے گئے  ہیں۔  کوئین میری روڈ اور اس کے اطراف کو بھی آلودگی والے علاقوں میں شامل کیا گیا ہے ۔ان علاقوں میں تعمیراتی کاموں پر مکمل طور پر پابندی ہوگی ۔ کمرشل جنریٹرز ان علاقوں میں نہیں چلائے جائیں گے ۔چنگ چی رکشہ کاان علاقوں میں جانا سختی سے بند رہے گا ۔
 اوپن باربی کیو پر رات آٹھ بجے کے بعد پابندی ہوگی۔ڈی جی ماحولیات پنجاب عمران حامد شیخ کے مطابق بڑھتی ہوئی سموگ اور فضائی آلودگی کوکم رکھنے کیلئے پنجاب حکومت نے یہ اقدام اٹھایا ہے۔  محکمہ  حولیات نے گرین لاک ڈاؤن لگانے کا نوٹیفکیشن جاری کردیاہے۔