اسلام آباد:نیشنل کمانڈ اینڈآپریشن سینٹر (این سی اوسی ) نے کورونا ویکسی نیشن میں بہتری دکھانے والے 60 فی صد شہروں سے پابندی اٹھانے کا اعلان کردیا ۔ اجلاس میں زندگی معمول پر لانے کے لئے اقدامات کا فیصلہ بھی کیا گیا ۔
تفصیلات کے مطابق نیشنل کمانڈ اینڈ آپریشن سینٹر (این سی او سی) کا اجلاس اسد عمر کی سربراہی میں ہوا جس میں ملک میں کورونا اور شہروں میں ویکسی نیشن کی صورتحال کا تفصیلی جائزہ لیا گیا۔اجلاس کے بعد این سی او سی کی طرف سے اعلامیہ جاری کیا گیا ۔
این سی او سی اجلاس کے بعد جاری اعلامیہ کے مطابق ویکسی نیشن میں کارکردگی دکھانے والے شہرں میں معاملات زندگی درجہ بدرجہ معمول پر لانے کا فیصلہ کیا گیا ہے۔
اعلامیے کے مطابق اسلام آباد، منڈی بہاءالدین، گلگت اور میرپور 60 فیصد آبادی کو ویکسین لگانے پر بہترین شہر قرار دیا گیا ہے جب کہ 40 سے 60 فیصد آبادی کوویکسین لگانے پر راولپنڈی، اسکردو، ہنزہ، باغ، بھمبر، جہلم، پشاور، غذر اور کھرمنگ کو بھی ویکسین شدہ شہر قرار دیا گیا ہے۔اس کے علاوہ دیگر شہروں میں 40 فیصد آبادی کی کم ویکسی نیشن کے باعث ویکسین کی شرح کم قرار دی گئی ہے۔
این سی او سی کا کہنا ہےکہ بہترین ویکسین شدہ شہروں میں اجتماعات اور شادی بیاہ میں نافذ پابندیاں ہٹادی گئی ہیں جب کہ ان شہروں میں اسپورٹس گراونڈز، تجارت، ان ڈور ڈائننگ اور کاروبار سے بھی پابندیاں اٹھالی گئی ہیں۔
این سی او سی کے مطابق بہترین ویکسین شدہ شہروں میں اندرون، بین الاضلاعی سفر میں مسافروں کی تعداد 100 فیصد کردی گئی ہے جب کہ کم ویکسین شدہ شہروں میں مسافروں کی تعداد کو 80 فیصد تک رکھا گیا ہے ، کم ویکسین شدہ شہروں میں اجتماعات، شادی بیاہ اور اسپورٹس گراؤنڈز میں پابندیاں 15 نومبر تک رہیں گی، ان شہروں میں تجارت،کاروبار، ان ڈورڈائننگ، سنیما،جم، مزارات اور ٹرانسپورٹ سیکٹر میں پابندیاں رہیں گے۔
کم ویکسین شدہ شہروں میں عوامی اجتماعات بالترتیب 500،300 تک برقراررکھنےکا فیصلہ کیا گیا ہے جب کہ تمام سہولیات کا تسلسل مکمل ویکسین لگوانے اور ماسک کے لازمی استعمال سے مشروط ہے۔این سی او سی کا کہنا ہےکہ 12 نومبر کو ہونے والے اجلاس میں فیصلوں پر نظر ثانی کی جائے گی ۔
