منڈلے: میانمار اور تھائی لینڈ میں آنے والے 7.7 شدت کے زلزلے نے بڑے پیمانے پر تباہی مچادی ہے۔ زلزلے کے نتیجے میں ہلاک ہونے والوں کی تعداد 1700سے بڑھ گئی ہے۔
غیر ملکی خبر رساں ایجنسی کے مطابق، میانمار کے وسطی علاقے ساگانگ کے شمال مغرب میں 7.7 شدت کے زلزلے کے جھٹکے محسوس ہوئے، جن کے کچھ منٹ بعد 6.7 شدت کے مزید جھٹکے آئے۔ زلزلے سے میانمار کے مختلف علاقوں میں عمارتیں گر گئیں، پل منہدم ہو گئے اور سڑکوں کو بھی شدید نقصان پہنچا۔ منڈلے شہر میں بڑے پیمانے پر تباہی ہوئی۔
میانمار کی حکومتی جنتا نے ایک بیان میں کہا کہ زلزلے سے مرنے والوں کی تعداد 1644 تک پہنچ چکی ہے، جبکہ 3,408 افراد زخمی ہوئے اور کم از کم 139 افراد ابھی تک لاپتا ہیں۔ مواصلاتی نظام کی خرابی کی وجہ سے فوجی زیر اقتدار علاقوں میں تباہی کے حقیقی اعداد و شمار سامنے نہیں آ سکے، اور ہلاکتوں میں مزید اضافے کا خدشہ ہے۔
امریکی ماہرین ارضیات کے مطابق، یہ زلزلہ میانمار میں ایک صدی سے زائد عرصے میں آنے والا سب سے طاقتور زلزلہ تھا، اور اس کے جھٹکے اتنے شدید تھے کہ زلزلے کے مرکز سے سیکڑوں کلومیٹر دور بنکاک میں بھی عمارتوں کو نقصان پہنچا۔