لاہور: پاکستان میں ہونے والی آئی سی سی چیمپئنز ٹرافی 2025 کے افتتاحی تقریب کا ممکنہ شیڈول جاری کر دیا گیا ہے۔ ایونٹ کی افتتاحی تقریب 16 فروری 2025 کو لاہور کے حضوری باغ میں منعقد کی جائے گی، جبکہ پہلا میچ کراچی میں کھیلا جائے گا۔
پاکستان کرکٹ بورڈ (پی سی بی) کے مطابق، وزیراعظم شہباز شریف 7 فروری کو قذافی اسٹیڈیم لاہور کا افتتاح کریں گے، اور نیشنل اسٹیڈیم کراچی کی افتتاحی تقریب 11 فروری کو ہوگی، جس میں صدر مملکت آصف علی زرداری کی شرکت متوقع ہے۔
افتتاحی تقریب میں ملک کی اہم شخصیات، کرکٹرز، اور آئی سی سی کے آفیشلز بھی شریک ہوں گے۔ ذرائع نے بتایا ہے کہ چیمپئنز ٹرافی سے پہلے کپتانوں کی جوائنٹ پریس کانفرنس کا انعقاد نہ ہونے کا امکان ہے۔
چیمپئنز ٹرافی 2025 کے افتتاحی میچ میں میزبان پاکستان کا مقابلہ نیوزی لینڈ کے ساتھ ہوگا۔ جبکہ پاکستان اور بھارت کے درمیان متوقع میچ 23 فروری کو نیوٹرل مقام پر کھیلا جائے گا۔
چیمپئنز ٹرافی 2025 کا پہلا سیمی فائنل 4 مارچ کو نیوٹرل وینیو پر ہوگا، جبکہ دوسرا سیمی فائنل 5 مارچ کو لاہور میں کھیلا جائے گا۔
آئی سی سی نے پاکستان میں ہونے والی چیمپئنز ٹرافی 2025 کے ساتھ ساتھ 2028 کے ویمنز ٹی20 ورلڈکپ کے ہائبرڈ ماڈل کے تحت انعقاد کا باضابطہ اعلان بھی کیا ہے۔
