ممبئی: بالی وڈ کے معروف اداکار عامر خان ایک بار پھر اپنی انوکھی اداکاری سے سب کو چونکانے کے لیے تیار ہیں۔ حالیہ دنوں میں ایک ویڈیو وائرل ہوئی ہے جس میں انہیں غاروں کے زمانے کے انسان (Caveman) کے انداز میں دیکھا جا سکتا ہے۔
ویڈیو میں عامر خان کو پروستھیٹکس، مصنوعی داڑھی اور منفرد میک اپ کے ذریعے مکمل طور پر ایک نئے روپ میں ڈھلا ہوا دکھایا گیا ہے، جب کہ پرانے اور بوسیدہ لباس نے ان کی شکل کو مزید حقیقی بنا دیا ہے۔
یہ ویڈیو سامنے آتے ہی سوشل میڈیا صارفین قیاس آرائیاں کرنے لگے کہ آیا یہ کسی فلم کا حصہ ہے یا کسی اشتہار کی تشہیر؟ کچھ رپورٹس کے مطابق، یہ محض ایک کمرشل کے لیے کیا گیا ہے، لیکن عامر خان کے پرستار اب بھی اصل حقیقت جاننے کے منتظر ہیں۔
دوسری جانب، ایک اور ویڈیو میں ایک لمبی داڑھی والے شخص کو ممبئی کی سڑکوں پر پرانے کپڑوں میں گھومتے دیکھا گیا، جسے لوگ عامر خان سمجھ رہے ہیں۔ اس منظر کے بعد مداحوں نے سوشل میڈیا پر تبصروں اور قیاس آرائیوں کا سلسلہ شروع کر دیا ہے۔
یاد رہے کہ عامر خان نے "لال سنگھ چڈھا" کی ناکامی کے بعد فلمی دنیا سے وقفہ لے لیا تھا، تاہم اب وہ اپنی نئی فلم "ستارے زمین پر" کے ذریعے دوبارہ اسکرین پر جلوہ گر ہونے جا رہے ہیں۔ یہ فلم 2007 کی بلاک بسٹر "تارے زمین پر" کا ایک تسلسل تصور کی جا رہی ہے، جو ایک اور سماجی مسئلے کو اجاگر کرے گی۔