لاہور: پاکستان کرکٹ بورڈ (پی سی بی) نے چیمپیئنز ٹرافی کی افتتاحی تقریبات کے شیڈول کی منظوری دے دی ہے، جس کے مطابق تقریبات کا آغاز 7 فروری سے ہوگا۔ چیئرمین پی سی بی محسن نقوی نے تمام تقریبات کی حتمی منظوری دی۔
شیڈول کے مطابق، 7 فروری کو قذافی سٹیڈیم لاہور میں افتتاحی تقریب منعقد کی جائے گی جس میں وزیراعظم شہباز شریف کے شرکت کرنے کا امکان ہے۔ اسی طرح 11 فروری کو کراچی کے نیشنل اسٹیڈیم میں افتتاحی تقریب ہوگی، جس کے مہمان خصوصی صدر آصف زرداری ہوں گے۔
چیمپیئنز ٹرافی کی مرکزی افتتاحی تقریب 16 فروری کو لاہور کے حضوری باغ میں ہوگی، جس میں اہم سیاسی شخصیات، کرکٹرز اور آئی سی سی کے نمائندے شرکت کریں گے۔
ایونٹ کا باقاعدہ آغاز 19 فروری سے ہوگا، جس میں پاکستان 29 سال بعد آئی سی سی ایونٹ کی میزبانی کرے گا۔ اس موقع پر پاکستان چیمپیئنز ٹرافی کا دفاعی چیمپیئن بھی ہے، کیونکہ 2017 میں سرفراز احمد کی قیادت میں پاکستان نے یہ ٹائٹل جیتا تھا۔
