لاہور: وزیر اعلیٰ پنجاب مریم نواز نے 'کھیلتا پنجاب گیمز' کا باقاعدہ افتتاح کر دیا، جس کے دوران گیمز کی مشعل بھی روشن کی گئی۔
تقریب سے خطاب کرتے ہوئے مریم نواز نے پنجاب کے نوجوانوں کی صلاحیتوں کو سراہا اور کہا کہ پنجاب میں ابھرتے ہوئے کھلاڑیوں کو دیکھ کر خوشی ہو رہی ہے، کیونکہ یہاں کے نوجوان کھیلوں میں غیر معمولی ٹیلنٹ رکھتے ہیں۔
انہوں نے 'کھیلتا پنجاب گیمز' کو پاکستان کی تاریخ کا ایک اہم ایونٹ قرار دیتے ہوئے کہا کہ وہ چاہتی ہیں کہ پنجاب میں بچے اور نوجوان کھیلوں میں حصہ لیں اور آگے بڑھیں، کیونکہ ماضی میں کئی سالوں تک پنجاب کے کھیل کے میدان ویران تھے۔
وزیر اعلیٰ نے نوجوانوں کو پیغام دیا کہ وہ کبھی بھی ملک کے خلاف کسی کے بہکاوے میں نہ آئیں اور کبھی بھی تشدد یا جلاؤ گھیراؤ کا حصہ نہ بنیں۔ طلبا کو دی جانے والی ہدایات میں مریم نواز نے کہا کہ حکومت ان کے لیے تعلیمی میدان میں بھی سہولتیں فراہم کر رہی ہے، جیسے لیپ ٹاپ اور الیکٹرک بائیکس۔
وزیر اعلیٰ نے عزم ظاہر کیا کہ پنجاب حکومت نوجوانوں کے لیے کھیلوں اور تعلیم دونوں کے میدانوں میں کامیابی کے مواقع فراہم کرے گی۔
