مونٹ منگانوئی : قومی کرکٹ ٹیم کے مڈل آرڈر بلے باز فواد عالم نے نیوزی لینڈ کیخلاف سنچری بنا کر کئی ریکارڈز اپنے نام کر لیے۔
بے اوول میں پاکستان کرکٹ ٹیم کو تو شکست کا سامنا کرنا پڑا لیکن اس میچ کی دوسری اننگز میں فواد عالم نے سنچری جڑی اور کئی منفرد ریکارڈز اپنے نام کر لیے۔
فواد عالم چوتھی اننگز میں نیوزی لینڈ کے خلاف سنچری بنانے والے پاکستان کے پہلے کرکٹر بن گئے ہیں۔ اس کے علاوہ فواد عالم نے ایشیا سے باہر چوتھی اننگز میں وکٹ پر سب سے زیادہ رکنے والے قومی کھلاڑی کا اعزاز بھی اپنے نام کیا۔
فواد عالم 360 سے زائد منٹس وکٹ پر موجود رہے جو اس صدی میں ایشیا سے باہر کسی بھی پاکستانی بلے باز کی جانب سے سب سے زیادہ ٹائم ہے۔
اس سے قبل اسد شفیق نے برسبین میں 2016 میں چوتھی اننگز میں 336 منٹ بیٹنگ کی تھی۔
خیال رہے کہ یہ فواد عالم کے کیریئر کی دوسری سنچری تھی۔ جو کہ 11 سال بعد انہوں نے بنائی۔ فواد عالم نے 2009 میں سری لنکا کیخلاف ڈیبیو میچ میں سنچری اسکور کی تھی۔
