لاہور:پنجاب حکومت کی جانب سے بسنت منانے کے اعلان کے بعد بسنت منانے والوں کی خوشیوں پر پانی پھر گیا ہے اور ڈی آئی جی آپریشنز نے پتنگ فروشوں اورپتنگ بازوں کیخلاف بھرپورکریک ڈائون کرنے کی ہدایت کردی ہے۔
ذرائع کے مطابق ڈی آئی جی آپریشنز نے پتنگ بازی کی روک تھام کیلئےتمام ایس پیزسپیشل ٹیموں کومتحرک کرنے کی ہدایت کردی جبکہ یہ بھی کہا کہ پتنگ بازوں کےخلاف بلا امتیاز کارروائی عمل میں لائی جائے۔
واضح رہے کہ وزیر اطلاعات پنجاب فیاض الحسن چوہان نے فروری کے دوسرے ہفتے میں بسنت منانے کا اعلان کیا تھا، لاہور میں میڈیا سے گفتگو کرتے ہوئے ان کا کہناتھا کہ ثقافتی حلقوں کی جانب سے بسنت منانے کا مطالبہ کیا جا رہا تھا ، اب بسنت کو فروری کے دوسرے ہفتے میں منانے کا فیصلہ کیا گیا ہے۔
انہوں نے کہا تھا کہ لاہور کی سول سوسائٹی اور شہریوں کی بڑی تعداد لاہور سمیت پنجاب میں ثقافتی سرگرمیوں کو عروج دینے کے لیے بسنت منانے کا مطالبہ کر رہی ہے جس پر عملدرآمد کا فیصلہ کیا گیا ہے۔بسنت کے دوران سکیورٹی کے انتظامات اور شہریوں کے جان و مال کے تحفظ کے لیے تجاویز مرتب کرنے کے لیے کمیٹی تشکیل دے دی گئی ہے جو کہ ایک ہفتے کے اندر اپنی رپورٹ جمع کرائے گی۔
حکومت کی طرف سے بسنت منانے کے اعلان کے بعد اس کے خلاف بڑا اقدام اٹھا تے ہوئے وکیل صفدر شاہین پیرزادہ نے لاہور ہائی کورٹ میں فیصلے کو چیلنج کردیا تھا۔ صفدر شاہین پیرزادہ ایڈووکیٹ کی جانب سے دائر درخواست میںموقف اختیار کیا گیا۔ڈور پھرنے کے واقعات سے بے شمار قیمتی جانیں ضائع ہوئیں،اربوں روپے کی قومی املاک کا نقصان پہنچا تھا۔
صفدر شاہین پیرزادہ نے موقف اختیار کیا کہ کوئی بھی ایسی تفریح جو انسانی جانوں کے ضیاع کا باعث بنے،اس کی اجازت دینا خلاف آئین ہے۔درخواست گزار نے استدعا کی عدالت حکومت کی جانب سے بسنت کی اجازت دینے کا اقدام کالعدم قرار دے.۔