راولپنڈی: پاک فوج کے شعبہ تعلقات عامہ (آئی ایس پی آر) کے مطابق، آرمی چیف جنرل سید عاصم منیر نے نیشنل کاؤنٹر ٹیررازم سینٹر پبی کا دورہ کیا اور پاک چین مشترکہ مشق "وارئیر 8" کا جائزہ لیا۔ اس مشق میں پاک فوج اور پیپلز لبریشن آرمی کی افواج شریک ہیں اور یہ مشق انسداد دہشت گردی کے حوالے سے دونوں افواج کے درمیان باہمی تعاون کو بڑھانے کے لیے منعقد کی جاتی ہے۔
آرمی چیف کو مشق کے مختلف پہلوؤں اور اس کے انعقاد کے بارے میں بریفنگ دی گئی۔ اس کے علاوہ، انہوں نے مشق میں شریک افسران اور جوانوں کے حوصلے اور پیشہ ورانہ مہارت کو سراہا۔ اس سال یہ مشق آٹھویں مرتبہ منعقد کی جا رہی ہے اور 19 نومبر کو شروع ہوئی۔ آرمی چیف کا کہنا تھا کہ ایسی مشقیں دونوں ممالک کے درمیان مضبوط دفاعی تعاون کی علامت ہیں۔