راولپنڈی: چیئرمین جوائنٹ چیفس آف سٹاف کمیٹی جنرل ساحر شمشاد مرزا نے پاکستان نیوی کے آپریشنل اثاثوں، آپریشنل سرفیس شپ اور سب میرین کا تفصیلی جائزہ لیا۔ پاک فوج کے شعبہ تعلقات عامہ (آئی ایس پی آر) کے مطابق جنرل ساحر شمشاد مرزا نے سمندر میں یونٹس کی آپریشنل تیاریوں اور جنگی تیاریوں کا جائزہ لیا اور اس دوران کوسٹل ایریا اور جہاز پر موجود ٹروپس کے ساتھ ملاقات کی۔
جنرل مرزا نے آپریشنل تیاریوں پر اطمینان کا اظہار کیا اور فوجی دستوں کے حوصلے کی بھی بھرپور تعریف کی۔ ان کا کہنا تھا کہ فیلڈ یونٹس کو مادرِ وطن کے دفاع کے لیے جدید ہتھیاروں اور آلات کے زیادہ سے زیادہ استعمال کو یقینی بنانا ہوگا۔ ان اقدامات سے فوج کی جنگی صلاحیتوں کو مزید بہتر بنایا جا رہا ہے، اور ملک کے دفاعی نظام میں مزید مضبوطی آئے گی۔
