اسلام آباد:وزیراعظم شہباز شریف نے قطر کے امیر شیخ تمیم بن حمد الثانی سے عیدالفطر کے موقع پر ٹیلیفونک گفتگو کی اور انہیں دل کی گہرائیوں سے عید کی مبارکباد دی۔ وزیرِ اعظم آفس کے مطابق، اس دوران دونوں رہنماؤں نے پاکستان اور قطر کے درمیان دیرینہ اور مستحکم برادرانہ تعلقات پر اطمینان کا اظہار کیا اور مختلف شعبوں میں تعاون کو فروغ دینے پر زور دیا۔
وزیراعظم نے امیر قطر کی غزہ میں امن کے قیام کے لیے کی جانے والی مؤثر کوششوں کی تعریف کی۔ انہوں نے کہا کہ قطر نے عالمی سطح پر امن کے قیام کے لیے جو مثبت کردار ادا کیا ہے، وہ قابلِ تحسین ہے۔
امیر قطر نے وزیراعظم کی عید کی مبارکباد کو قبول کیا اور پاکستانی عوام کے لیے نیک خواہشات کا اظہار کیا۔ انہوں نے وزیراعظم کے دورہ قطر کے دوران منظر آرٹ گیلری کی افتتاحی تقریب میں بطور مہمان خصوصی شرکت پر شکر گزار بھی ہوئے۔
امیر قطر نے وزیرِ اعظم کو بتایا کہ عید کے فوراً بعد ایک اعلیٰ سطحی قطری وفد پاکستان کا دورہ کرے گا، جس کا مقصد دونوں ممالک کے درمیان اقتصادی اور نجی شعبوں میں مزید تعاون کو فروغ دینا ہے۔
وزیراعظم نے قطر کے ساتھ ثقافتی تعلقات کے مزید استحکام کے لیے لاہور میں نمائش کے انعقاد کی تجویز بھی دی، جسے قطری امیر نے خوش دلی سے قبول کیا۔ وزیرِ اعظم نے قطر کے امیر کو پاکستان کا دورہ کرنے کی دعوت بھی دی، جسے امیر قطر نے خوشی سے منظور کیا۔
