لاہور: لاہور ہائیکورٹ نے استحکام پاکستان پارٹی کے رہنما عون چودھری کی این اے 128 سے کامیابی کیخلاف درخواست سماعت کیلئے مقرر کرنے کا حکم دے دیا۔
لاہور ہائیکورٹ کے جج جسٹس فیصل زمان خان نے این اے 128 سے آزاد امیدوار سلمان اکرم راجہ کی درخواست پر بطور اعتراض سماعت کی۔
درخواست گزار کی جانب سے مؤقف اختیار کیا گیا کہ ہم نے عون چودھری کی حلقہ این اے 128 سے جیت کے خلاف الیکشن کمیشن سے رجوع کیا تھا، الیکشن کمیشن نے کہا کہ آپ الیکشن ٹریبونل میں درخواست دائر کریں، الیکشن کمیشن نے اپنے قانونی جواز کو استعمال نہیں کیا۔
درخواست میں استدعا کی گئی کہ عدالت الیکشن کمیشن کے فیصلے کو کالعدم قرار دے اور حلقہ این اے 128 سے عون چودھری کی کامیابی کا نوٹیفکیشن معطل کرنے کے احکامات جاری کرے۔
سلمان اکرم راجہ کے وکیل نے عدالت کو آگاہ کیا کہ پہلے اسی نوعیت کی درخواستوں پر جسٹس علی باقر نجفی سماعت کر چکے ہیں، لہذا یہ درخواست بھی جسٹس علی باقر نجفی کو ارسال کی جائے۔
لاہور ہائیکورٹ کے رجسٹرار آفس کی جانب سے درخواست پر اعتراض عائد کیا گیا، آج عدالت نے رجسٹرار آفس کا اعتراض دور کر کے درخواست کو سماعت کیلئے مقرر کرنے کا حکم دے دیا۔
جسٹس فیصل زمان خان نے رجسٹرار آفس کو درخواست جسٹس علی باقر کی عدالت میں بھیجنے کی ہدایت کرتے ہوئے ریمارکس دیئے کہ پہلے اسی نوعیت کی درخواست پر جسٹس علی باقر نجفی نے سماعت کی تھی۔
