عمران خان مذاکرات اور آگے بڑھنے کیلئے انڈرٹیکنگ دینے کو تیار ہیں: اسد عمر

لاہور: پاکستان تحریک انصاف (پی ٹی آئی) کے رہنما اسد عمر نے کہا ہے کہ سابق وزیراعظم عمران خان سیاسی جماعتوں کے ساتھ مذاکرات اور آگے بڑھنے کیلئے انڈر ٹیکنگ دینے کو تیار ہیں۔
تفصیلات کے مطابق نجی ٹی وی سے گفتگو کرتے ہوئے اسد عمر کا کہنا تھا کہ چیف جسٹس اہم بات کررہے ہیں کہ تمام جماعتیں ایک لائحہ عمل پر اتفاق رائے کریں،چیف جسٹس کی یہ مثبت بات ہے کہ وہ سب کو اکھٹا کرنا چاہتے ہیں۔
واضح رہے کہ آج سپریم کورٹ میں انتخابات کی تاریخ کے حوالے سے کیس کی سماعت کے دوران چیف جسٹس عمر عطا بندیال نے اٹارنی جنرل سے کہا کہ وہ وزارت داخلہ اور وزارت دفاع سے کم سے کم وقت میں انتخابات کا پوچھ کر بتائیں۔
چیف جسٹس نے ریمارکس دئیے کہ عدالتی کارروائی کسی کو فائدہ دینے کیلئے نہیں ہے، گزشتہ روز شفاف الیکشن کیلئے سیاسی درجہ حرارت کم کرنے کا کہا لیکن کسی فریق نے سیاسی درجہ حرارت کم کرنے کی یقین دہانی نہیں کرائی۔
اس پر پی ٹی آئی کے وکیل علی ظفر نے کہا کہ وہ عدالت کو مکمل یقین دہانی کرانے کیلئے تیار ہیں جس پر چیف جسٹس نے کہا کہ یقین دہانی کس کی طرف سے ہے، نام بتائیں؟
پی ٹی آئی کے وکیل نے کہا کہ وہ چیئرمین پی ٹی آئی کی جانب سے تحریری یقین دہانی کرائیں گے، چیف جسٹس نے کہا کہ حکومت کی جانب سے کون یقین دہانی کرائے گا یہ بتایا جائے۔