لاہور (ارسلان جاوید )وکٹ کیپر بلے باز محمد رضوان کا کہنا ہے کہ انگلینڈ کے خلاف اچھا مقابلہ دیکھنے کو ملے گا ،قومی ٹیم نے گزشتہ 6 سیریز میں کامیابی حاصل کی ہے ،جب بھی ہماری ٹیم انگلینڈآئی لڑکوں نے اچھا پرفارم کیا ۔
ڈربی میں وکٹ کیپر بلے باز محمد رضوان نے ورچوئل پریس کانفرنس کرتے ہوئے کہا کپتانی کے حوالے سے نہیں سوچتا ،بطور کھلاڑی بہترین پرفارمنس کرنے کی کوشش کرتا ہوں،قومی ٹیم میں وائس کپتان ہوں ،کپتان کو جہاں ضرورت ہوتی ہے اپنی رائے ضرور دیتا ہوں ۔
محمد رضوان نے مزید کہا مجھ پر کوئی دبائو نہیں ،اپنی بیٹنگ کو انجوائے کرتا ہوں ،قومی کرکٹ ٹیم کی کارکردگی پر بات کرتے ہوئے رضوان کا کہنا تھا ہمارے مڈل آرڈر کا تھوڑا مسئلہ ہے جس پر لڑکے محنت کر رہے ہیں ،ہمارے زیادہ مسائل مڈل آرڈر کے ہیں ،انہوں نے کہاابھی دو کیپرز ہیں زیاد ہ بھی ہوں تو مقابلہ مضبوط ہوگا ۔
بیٹنگ لائن پر بات کرتے ہوئے وکٹ کیپر محمد رضوان نے کہا بابر اعظم بہترین بیٹسمین ہیں ،ان کی ہمیشہ کوشش ہوتی ہے کہ اپنا سٹرائیک ریٹ بہتر رکھوں ،صہیب مقصود نے کراچی لیگ میں پانچویں نمبر پر کھیلا اور بہترین پرفارم کیا ،صہیب مقصو د کو جہاں موقع دینگے وہ پرفارم کرے گا ،اوپننگ کیلئے بابر اعظم اور مجھے جہاں قربانی دینا پڑی دی ہے ،امید ہے اس دفعہ بھی لڑکے انگلینڈ میں بہترین پرفارم کرینگے ۔
