کراچی میں سٹریٹ کرائم کی بڑی واردات، سی سی ٹی وی فوٹیج منظر عام پر آگئی

کراچی:  گلشن جمال میں ایک شہری سے گھر کے باہر ڈاکوؤں نے 50 لاکھ روپے لوٹ لیے، جس کی سی سی ٹی وی ویڈیو بھی سامنے آگئی ہے۔
یہ واردات گزشتہ رات ہوئی، جب ایک شہری بینک سے پیسے لے کر اپنے گھر واپس جا رہا تھا اور اسے اس کے گھر کی دہلیز پر ڈاکوؤں نے نشانہ بنایا۔ سی سی ٹی وی فوٹیج میں دیکھا جا سکتا ہے کہ موٹر سائیکل سوار مسلح ملزمان شہری کا تعاقب کرتے ہوئے گلشن جمال میں اس کے گھر تک پہنچے۔
ویڈیو میں دکھایا گیا ہے کہ شہری نے ملزمان کو دیکھ کر اپنی گاڑی لاک کر دی، لیکن ایک ملزم نے اسلحہ کے زور پر شہری کو گاڑی میں ہی محصور کر لیا، جب کہ دو دیگر ملزمان نے پستول کے بٹ سے گاڑی کا شیشہ توڑ کر اس میں رکھی رقم سے بھرا بیگ نکال لیا۔
ویڈیو میں ملزمان کو رقم کے بیگ کے ساتھ فرار ہوتے ہوئے دیکھا جا سکتا ہے۔ پولیس سی سی ٹی وی فوٹیج کی مدد سے ملزمان کی گرفتاری کی کوشش کر رہی ہے۔