فیصل آباد : مایہ ناز طبی ماہر ڈاکٹر تصور اسلم بھٹہ کی کتاب "زبان یار من ترکی" کی تقریب رونمائی فیصل آباد میڈیکل یونیورسٹی کے آڈٹیوریم میں ہوئی ۔ تقریب کی صدارت وائس چانسلر پروفیسر ڈاکٹر ظفر علی چوہدری نے کی جبکہ اصغر ندیم سید بطور مہمان خصوصی شریک ہوئے۔
کتاب ترکی پر ایک تحقیقی اور تاریخی سفرنامہ ہے جو تین سال میں مکمل ہوا. کتاب میں عثمانی ترکوں کے دور حکومت کا تفصیلی جائزہ لیا گیا. کتاب کی اشاعت کا اہتمام ایشیا پیسفیک چیمبر آف کامرس اینڈ انڈسٹری کے بانی ڈاکٹر حسن خلیل نے کیا.
وائس چانسلر نے ترکی اور پاکستان کے دیرینہ سماجی، سیاسی ثقافتی تعلقات پر روشنی ڈالی. انہوں نے ڈاکٹر حسن خلیل اور ایشیا پیسفیک چیمبر آف کامرس اینڈ انڈسٹری کے تعاون کو سراہا جنہوں نے اس تاریخی کتاب کی اشاعت کو ممکن بنایا.
دیگر مہمان گرامی نے کتاب کے حوالے سے اپنے خصوصی خطاب میں کہا "زبانِ یارِ من ترکی "، ترکی کے حیرت انگیز سفر پر مبنی یہ کتاب پاکستان اور ترکی کے درمیان عمیق تعلقات کی عکاسی کرتی ہے اور ڈاکٹر تصور بھٹہ کا قلم تاریخ، ثقافت اور دونوں ممالک کے مابین گہرے جذباتی بندھن کو نمایاں کرتا ہے۔
"زبانِ یارِ من" محض ایک کتاب نہیں بلکہ دو قوموں کے درمیان موجود بے پناہ محبت، احترام اور باہمی اشتراک کی ایک زندہ مثال ہے۔ اس سفرنامے کے ذریعے، مصنف نے ترکی کی زمینوں پر اپنے قدم رکھنے کے لمحات کو بیان کیا ہے، جہاں ہر گوشہ، ہر بستی اور ہر شہر پاکستان اور ترکی کے مابین دیرینہ دوستی کی کہانیاں سناتا ہے۔
اس کتاب کا اجراء پاکستان اور ترکی کے تعلقات میں ایک نیا باب رقم کرنے کا سبب بنے گا، جو کہ ایک دوسرے کی ثقافت، تاریخ اور عوام کے مابین محبت اور احترام کو مزید مضبوط بنائے گا۔ "زبانِ یارِ من" کے ذریعے، قارئین کو نہ صرف ترکی کی خوبصورتی اور اس کی غنی ثقافت کا تجربہ ہوگا بلکہ انہیں یہ بھی معلوم ہوگا کہ کس طرح دونوں ممالک اپنی مشترکہ تاریخ اور مقاصد کے ساتھ آگے بڑھ رہے ہیں۔
مقررین میں پروفیسر ڈاکٹر طاہرہ اقبال،ڈاکٹر محسن مگھیانہ، پروفیسر مریم صدیق، ڈاکٹر محبوب کشمیری شامل تھے. تمام شرکاء نے اظہار خیال کرتے ہوئے کتاب کی تحقیق، اشاعت اور لب لباب کو بہت سراہا۔
تقریب کے آخر میں ڈاکٹر تصور اسلم بھٹہ نے تمام شرکا کا شکریہ ادا کیا۔ تقریب کے آخر میں تمام مہمان گرامی میں شیلڈ تقسیم کی گئ.
