کراچی :رواں مالی سال کے ابتدائی دو ماہ میں پاکستان کی برآمدات میں کئی ممالک کے لیے زبردست اضافہ دیکھا گیا ہے۔ سنگاپور کے لیے برآمدات میں 585 فیصد کا حیران کن اضافہ ہوا، جبکہ امریکہ کے لیے برآمدات کا حجم 98 کروڑ ڈالر تک پہنچ گیا، جو کہ سب سے زیادہ ہے۔
ذرائع کے مطابق، مالی سال کے پہلے دو ماہ میں قازقستان کے لیے برآمدات میں 528 فیصد اور فلپائن کے لیے 148 فیصد اضافہ ریکارڈ کیا گیا۔ اسی دوران متحدہ عرب امارات کے لیے برآمدات میں 56 فیصد، سری لنکا کے لیے 50 فیصد، افغانستان کے لیے 42 فیصد اور بنگلہ دیش کے لیے 34 فیصد کا اضافہ ہوا۔
مزید برآں، اومان اور سعودی عرب کے لیے برآمدات میں بھی بالترتیب 35 فیصد اور 24 فیصد کا اضافہ ہوا۔ امریکا کے علاوہ اٹلی، جرمنی، اور برطانیہ کے لیے بھی برآمدات میں مناسب اضافہ دیکھنے کو ملا، جہاں اٹلی کے لیے 12.6 فیصد، جرمنی کے لیے 12.3 فیصد اور برطانیہ کے لیے 5.4 فیصد کا اضافہ ہوا۔
یہ اعداد و شمار ظاہر کرتے ہیں کہ پاکستان کی برآمدات کی کارکردگی میں بہتری آ رہی ہے، جو معیشت کے لیے ایک مثبت علامت ہے۔
