اسلام آباد : آج ایوان بالا (سینیٹ) اور ایوان زیریں (قومی اسمبلی) کے اجلاس طلب کر لیے گئے ہیں۔
سینیٹ کا اجلاس سہ پہر ساڑھے 4 بجے پارلیمنٹ ہاؤس میں ہوگا، جس کا 5 نکاتی ایجنڈا بھی جاری کر دیا گیا ہے۔ اجلاس کا آغاز پاکستان اور روسی فیڈریشن کے قومی ترانوں سے ہوگا، جبکہ چیئرمین سینیٹ سید یوسف رضا گیلانی استقبالیہ خطاب کریں گے۔روس کی فیڈرل اسمبلی کی سپیکر ویلنٹینا مٹوینکو خصوصی مہمان کے طور پر خطاب کریں گی۔
دوسری جانب قومی اسمبلی کا اجلاس بھی شام 5 بجے دوبارہ شروع ہوگا، جس کا 6 نکاتی ایجنڈا جاری کیا گیا ہے۔
قومی اسمبلی میں سوالات کے وقفہ کے دوران مختلف سوالات کے جوابات دیے جائیں گے۔ وفاقی سرکاری ملازمین کے بچوں کی تعلیمی فیس کی ادائیگی سے متعلق توجہ دلاؤ نوٹس بھی ایجنڈے کا حصہ ہے، جبکہ وزیر قانون اعظم نذیر تارڑ صدر مملکت کے مشترکہ اجلاس سے خطاب پر اظہار تشکر کی تحریک بھی پیش کریں گے۔
