لاہور: وفاقی وزیرداخلہ رانا ثنااللہ کی پریس کانفرنس کے جواب میں چئیرمین پی ٹی آئی عمران خان کا ردعمل سامنے آگیا۔ خواتین کے ساتھ کبھی بھی اتنا برا سلوک اور ہراساں نہیں کیا گیا جتنا اس فسطائی حکومت کی جانب سے کیا جا رہا ہے۔
سماجی رابطے کی ویب سائٹ ٹوئٹر پرعمران خان نے رانا ثناء اللہ کی پریس کانفرنس کا جواب دیتے ہوئے کہا کہ اگر کوئی شک تھا بھی کہ جیلوں میں خواتین کے ساتھ بدسلوکی کی جارہی ہے تو اس سند یافتہ مجرم کی اس پریس کانفرنس کے بعد سارے شکوک و شبہات دور ہو جانے چاہئیں۔
عمران خان نے اپنے بیان میں مزید کہا کہ یہ شخص یقینی طور پر ان خوفناک کہانیوں کو ایک سازش کے جواز میں چھپانے اور قبل از وقت ان کا پردہ چاک کرنے کی آڑ میں ذمہ داری سے فرار کی کوششیں کررہا ہے، جو عنقریب منظرِ عام پر آنے والی ہیں۔
پاکستان تحریک انصاف کے چیئر مین عمران خان نے مزید کہا کہ خواتین کو آج سے پہلے ریاست نے کبھی اس طرز کی بدسلوکی اور ہراسگی کا نشانہ نہیں بنایا جیسے پرامن احتجاج کے اپنے بنیادی حق کے استعمال کی پاداش میں انہیں اس فسطائی حکومت کی جانب سے بنایا جا رہا ہے۔