کیلیفورنیا: فیس بک نے صارفین کو دوستوں کا مواد زیادہ سے زیادہ دکھانے کے لیے نیا فیچر ’فرینڈز ٹیب‘ متعارف کروا دیا۔
میٹا کی جانب سے جاری بیان کے مطابق 27 مارچ سے فیس بک پر ’فرینڈز ٹیب‘ کا فیچر فعال کر دیا گیا ہے، تاہم فی الحال یہ سہولت صرف امریکا اور کینیڈا کے صارفین کے لیے دستیاب ہے۔ دیگر ممالک میں یہ فیچر بتدریج متعارف کرایا جائے گا۔
’فرینڈز ٹیب‘ کے تحت صارفین اپنی پروفائل پر خصوصی طور پر صرف اپنے دوستوں کی پوسٹس، ویڈیوز اور دیگر مواد دیکھ سکیں گے۔ یہ نیا فیچر پرانے ’فرینڈز ریکویسٹ‘ ٹیب کی جگہ لے چکا ہے۔ اب صارفین کو ’فرینڈز ریکویسٹ‘ کی جگہ صرف ’فرینڈز‘ لکھا ہوا نظر آئے گا۔
جیسے ہی صارفین ’فرینڈز‘ پر کلک کریں گے، ایک نیا ٹیب کھل جائے گا جہاں صرف دوستوں کا مواد نظر آئے گا۔ اسی سیکشن میں ’فرینڈز ریکویسٹس‘ بھی موجود ہوں گی، جبکہ دوستوں کی جانب سے شیئر کردہ پوسٹس اور ویڈیوز بھی دیکھی جا سکیں گی۔
اس فیچر کو سیٹنگ میں جا کر پن بھی کیا جا سکتا ہے، جس کے بعد ’فرینڈز‘ ٹیب صارف کی پروفائل پر سب سے اوپر نظر آئے گا۔
اگرچہ یہ فیچر فوری طور پر پاکستانی صارفین کے لیے دستیاب نہیں ہے، لیکن میٹا کا کہنا ہے کہ بتدریج اسے پاکستان سمیت دیگر ممالک میں بھی فعال کر دیا جائے گا۔
