لندن: معروف پاکستانی اداکار فیروز خان کو برطانوی پارلیمنٹ نے "اسٹار آف پاکستان" ایوارڈ سے نواز دیا۔ یہ ایوارڈ ہاؤس آف لارڈز میں منعقد ہونے والی ایک پروقار تقریب میں دیا گیا۔ اس موقع پر فیروز خان کی اہلیہ ڈاکٹر زینب بھی ان کے ہمراہ موجود تھیں۔
ایوارڈ تقریب کا اہتمام بھارتی نژاد برطانوی لارڈ کلدیپ سنگھ سوتھ اور بارونس آلڈین نے کیا تھا۔ اس تقریب میں دیگر برطانوی اراکین اسمبلی کے علاوہ فیروز خان کے مداح، میڈیا سے وابستہ افراد، یوٹیوبرز اور ٹک ٹاکرز نے بھی شرکت کی۔
فیروز خان نے ایوارڈ ملنے پر خوشی کا اظہار کرتے ہوئے برطانوی پارلیمنٹ اور تقریب کے منتظمین کا شکریہ ادا کیا۔ انہوں نے کہا کہ "یہ ایوارڈ میرے لیے باعثِ افتخار ہے۔"
فیروز خان نے پاکستانی ڈرامہ انڈسٹری میں کئی کامیاب ڈرامے دیے ہیں، جن میں خانی، عشقیہ، خدا اور محبت، رومیو ویڈز ہیر اور حبس شامل ہیں۔ ان ڈراموں میں ان کی شاندار اداکاری نے مداحوں کے دل جیت لیے۔
واضح رہے کہ رواں برس یہ ایوارڈ بشریٰ انصاری اور ہانیہ عامر کو بھی دیا جا چکا ہے، جبکہ گزشتہ برس ماہرہ خان اور فہد مصطفیٰ کو بھی اسی اعزاز سے نوازا گیا تھا.