اسلام آباد: وزیراعظم کی زیر صدارت سیاسی اور عسکری قیادت کا اہم اجلاس ہوا، جس میں دہشت گردی کے خلاف زیرو ٹالرنس پالیسی پر عمل درآمد کے لیے بڑے فیصلے کیے گئے۔ اجلاس میں چاروں صوبوں، آزاد کشمیر اور گلگت بلتستان کے اعلیٰ حکام نے بھی شرکت کی۔
اجلاس میں جعفر ایکسپریس حملے کے ذمہ داروں کو دنیا کے سامنے بے نقاب کرنے کے عزم کا اظہار کیا گیا۔ وزیراعظم نے ہدایت کی کہ حملہ آوروں کو بے نقاب کرنے میں کوئی کسر نہ چھوڑی جائے۔ اس کے علاوہ روایتی اور ڈیجیٹل میڈیا پر جاری ملک دشمن مہم کا بھرپور جواب دینے کا بھی فیصلہ کیا گیا۔
نیشنل ایکشن پلان کے تحت قومی بیانیے کو مضبوط بنانے پر اتفاق کیا گیا۔ وزیراعظم نے قومی بیانیہ کمیٹی کو ہدایات دیں کہ دہشت گردوں اور شرپسندوں کے سدباب کے لیے مؤثر اور سرگرم بیانیہ تیار کیا جائے۔
اجلاس میں یہ بھی فیصلہ کیا گیا کہ قومی بیانیے اور ملکی سلامتی کے خلاف کسی بھی قسم کے مواد کا سختی سے سدباب کیا جائے گا۔ ملکی سلامتی اور ہم آہنگی کے لیے تمام صوبوں کے درمیان تعاون اور روابط کو مزید بہتر بنانے پر بھی اتفاق کیا گیا۔
اجلاس کے شرکاء نے دہشت گردی کے خلاف قومی عزم کو مزید مضبوط کرنے کا عہد کیا اور عوام کے جان و مال کے تحفظ کے لیے ہر ممکن اقدامات کرنے پر زور دیا۔
