لاہور: رمضان المبارک کی 27 ویں شب، جو شب قدر کہلاتی ہے، ملک بھر کی مساجد میں خصوصی عبادات، ختم قرآن اور ذکر و اذکار کی محافل کا اہتمام کیا گیا۔لاہور کی بادشاہی مسجد میں خصوصی عبادات کا اہتمام کیا گیا، جہاں چیئرمین رویت ہلال کمیٹی مولانا عبدالخبیر آزار نے ملک کی سلامتی اور خوشحالی کے لیے دعا کرائی۔
کراچی کی جامع مسجد عیدگاہ میں بھی ملک کی ترقی و خوشحالی کے لیے دعائیں کی گئیں، جبکہ فیصل مسجد اسلام آباد میں قرآن خوانی کا روح پرور اجتماع منعقد ہوا۔ پشاور کی مسجد مہابت خان میں بھی خصوصی دعا کا اہتمام کیا گیا۔
فرزندان اسلام نے لیلة القدر کی تلاش میں رات بھر عبادات کیں اور اللہ کی رحمت، مغفرت اور برکت کی دعا کی۔
