ابوجا: نائیجیریا سے امریکا جانے والے ایک طیارے کو دوران پرواز تکنیکی خرابی کے باعث ہنگامی طور پر واپس نائیجیریا میں لینڈ کرایا گیا۔ ذرائع کے مطابق، طیارے میں اچانک نیچے جانے کی وجہ سے شدید جھٹکے لگے جس کے نتیجے میں 40 مسافر زخمی ہو گئے، جن میں سے 6 کی حالت شدید تشویشناک بتائی جا رہی ہے۔
دوران پرواز طیارے کے ہچکولے اور مسافروں کی چیخ پکار کی ویڈیو بھی سوشل میڈیا پر وائرل ہو گئی، جس نے مسافروں کی مشکلات کو اجاگر کیا۔ امریکی میڈیا کے مطابق، اس طیارے میں 245 مسافر اور عملے کے 11 افراد سوار تھے۔ تکنیکی خرابی کے باعث یہ ہنگامی لینڈنگ کی گئی، اور زخمی مسافروں کو فوری طور پر طبی امداد فراہم کی گئی۔
