لندن: شریف فیملی کے ارکان کو نامعلوم افراد کی طرف سے پرتشدد حملے کا خطرہ ظاہر کیا گیا ہے۔ قابل اعتماد ذرائع کے مطابق، میٹ پولیس نے شریف فیملی کو اس خطرے کے بارے میں خبردار کیا ہے، اور ویسٹ مڈلینڈز پولیس نے لندن کی میٹروپولیٹن پولیس کو ممکنہ حملے کے حوالے سے اطلاع دی۔
ذرائع کا کہنا ہے کہ ویسٹ مڈلینڈز پولیس کو یہ اطلاع انٹیلی جنس مانیٹرنگ سسٹم کے ذریعے ملی تھی، جس کے بعد اسکاٹ لینڈ یارڈ کے افسران نے ایون فیلڈ فلیٹ میں جا کر شریف فیملی کے ارکان کو اس خطرے سے آگاہ کیا۔ پولیس نے انہیں چوکنا رہنے اور آمد و رفت میں احتیاط برتنے کی ہدایت کی ہے۔
یاد رہے کہ دو ہفتے قبل گلفام حسین کو ایون فیلڈ فلیٹس کے باہر سے گرفتار کیا گیا تھا اور اسے فلیٹس کے قریب جانے سے منع کر دیا گیا تھا۔ تاہم ذرائع کا کہنا ہے کہ گلفام حسین کی گرفتاری کا ویسٹ مڈلینڈز پولیس کے انتباہ سے کوئی تعلق نہیں ہے۔
شریف خاندان کے بیشتر افراد اس وقت پاکستان منتقل ہو چکے ہیں، اور حملے کے خطرے کے حوالے سے رابطہ کرنے پر شریف فیملی نے کوئی ردعمل نہیں دیا۔