لاہور: وزیر اعلیٰ پنجاب مریم نواز نے اپوزیشن کو ساتھ چلنے کی دعوت دے دی۔ وزیر اعلیٰ پنجاب مریم نواز نے ایوان میں اپوزیشن لیڈر کی نشست پر جاکر سنی اتحاد کونسل کے رکن پنجاب اسمبلی رانا آفتاب سے گفتگو کی اور اپوزیشن کو ساتھ چلنے کی دعوت دی۔
مریم نواز نے کہا کہ جمہوریت کے سفر میں اپوزیشن کا کردار نہایت اہم ہے، اپوزیشن کو ساتھ لے کر چلیں گے، عوام کی خدمت کر کے اپنے مخالفین کے دعوؤں کو غلط ثابت کروں گی۔
وزیر اعلیٰ پنجاب نے کہا کہ عوام کی خدمت میرا فرض ہے اور اسے میں پوری طرح نبھاؤں گی، مخالفین کو سمجھ نہیں آرہی کہ ہم کیا کرنے جارہے ہیں، اللہ خیر کرے گا۔
انہوں نے کہا کہ میرا کام پنجاب کی عوام کیلئے آسانی پیدا کرنا ہے، مشکل برداشت کرلوں گی لیکن عوام پر مشکل برداشت نہیں کروں گی میری ہدایت کے باجود ٹریفک رکتی ہے، یہ آہستہ آہستہ ٹھیک ہوجائے گا۔
