اسلام آباد: پاکستانی روپے کی قدر میں کمی اور بین الاقوامی سطح پر تیل کی قیمتوں میں اضافے کے پیش نظر رواں ماہ کے آخر یا آیندہ ماہ کے شروع میں پٹرولیم مصنوعات کی قیمتوں میں بڑے اضافے کا امکان ہے۔
ہر گزرتے دن کے ساتھ ڈالر کے مقابلے میں روپے کی قدر گھٹ رہی ہے۔ گزشتہ ہفتے انٹربینک میں روپے کے مقابلے میں ڈالر کی قیمت بلند ترین سطح پر پہنچی تھی جبکہ رواں ہفتے بین الاقوامی مارکیٹ میں تیل کی قیمتوں میں اضافہ ہوا ہے۔
آج کاروباری ہفتے کے پہلے دن کے آغاز سے ہی امریکی ڈالر نے مزید اڑان بھرنا شروع کر دی، انٹر بینک میں ڈالر 20 پیسے مہنگا ہونے کے بعد 301 روپے 20 پیسے کا ہو گیا۔
ذرائع نے انکشاف کیا کہ پاکستان پٹرولیم مصنوعات کو بلند قیمتوں پر خریدے گا جس کے باعث پیٹرول اور ڈیزل کی قیمت اگست کے آخر میں یاستمبر کے پہلے پندرہ دن میں مزید بڑھ سکتی ہے۔
پیٹرولیم مصنوعات کی قیمتوں میں حالیہ اضافہ، بجلی کے نرخوں میں حیران کن اضافے نے بڑے پیمانے پر عوام کو ہلا کر رکھ دیا ہے، جو پہلے ہی معاشی بدحالی کا شکار ہے۔
