نئی دہلی: بھارت میں زلزلے کے شدید جھٹکے محسوس کئے گئے ہیں۔ زلزلہ اتنا شدید تھا کہ اس سے گھروں اور عمارتوں کے در ودیوار ہل گئے، لوگ خوف کے مارے گھروں سے باہر نکل آئے۔
زلزلہ پیما مرکز کے مطابق ریکٹر سکیل پر چھ اعشاریہ چار ریکارڈ کی گئی۔ انڈین میڈیا کے مطابق اطلاعات ہیں کہ اس زلزلے سے عمارتوں کو شدید نقصان پہنچا ہے تاہم کسی جانی نقصان کی ابھی تک اطلاعات نہیں ملی ہیں۔
انڈین میڈیا کا کہنا ہے کہ ریاست آسام میں محسوس کئے جانے والے اس شدید زلزلے کا مرکز تیزپور کا مغربی حصہ جبکہ اس کی زیر زمین گہرائی 17 کلومیٹر تھی۔
ادھر امریکی زلزلہ پیما مرکز نے کہا ہے کہ آسام میں آںے والے زلزلے کی شدت چھ اعشاریہ دو جبکہ زیر زمین گہرائی 34 کلومیٹر تھی۔ اس زلزلے کا مرکز ایک گاؤں تھا جس کا نام گوہائی بتایا جا رہا ہے۔
میڈیا کا کہنا ہے کہ ریاست آسام کے شمالی علاقوں میں ابھی تک شہری اس شدید زلزلے کے آفٹر شاکس محسوس کر رہے ہیں۔
بھارتی ریاست آسام کے وزیراعلیٰ سربانندا سنوول کی جانب سے عوام سے اپیل کی گئی ہے کہ وہ چوکنا رہیں کیونکہ زلزلہ بہت شدید تھا جس کی وجہ سے عمارتوں کو شدید نقصان پہنچا تھا، حکومت نے بھی اپنی تمام ٹیموں کو ہائی الرٹ رہنے کی ہدایات جاری کر دی ہیں۔
