کوالالمپور: معروف اسلامی اسکالر ڈاکٹر ذاکر نائیک نے بہو کی تلاش کے لئے فیس بک پر اشتہار دے دیا۔
ڈاکٹر ذاکر نائیک نے فیس بک پوسٹ میں لکھا ہےکہ میں اپنے بیٹے فارِق کی شادی کے لیے لڑکی تلاش کر رہا ہوں اور اس کے لیے اچھے کردار والی مسلم لڑکی ڈھونڈ رہا ہوں تاکہ میرا بیٹا اور اس کی بیوی ایک دوسرے کے لیے رہنمائی اور طاقت کا ذریعہ بن جائیں۔ اگر آپ کسی لڑکی کے والد یا رشتے دار ہیں اور اس معاملے میں دلچسپی رکھتے ہیں تو آپ سے عاجزانہ درخواست ہے کہ اس پوسٹ کا مطلوبہ معلومات کے ساتھ جواب بھیجیں۔
اسکالر نے اپنی پوسٹ میں تفصیل سے لکھا ہےک ہ انہیں کیسی بہو درکار ہے۔ ذاکر نائیک کے مطابق لازمی شرائط کے تحت لڑکی قرآن و حدیث کی روشنی میں اسلامی اصولوں پر کاربند ہو اور فرائض کی پابند ہو،حرام چیزوں سے دور رہنے والی ہو اور جتنا ممکن ہوسکے مستحب (سنت) پر عمل کرے۔
لڑکی نیک ہو ، سیدھے رستے پر چلنے والی ہو ، اچھے اخلاق کے ساتھ نرم دل اور ہمدرد ہو اور دعوت دین کےکاموں میں اپنے شوہر کا ساتھ دے اور اس کا حوصلہ بڑھائے، لڑکی خود بھی دعوت کے کاموں سے شغف رکھنے والی اور اسلامی تعلیمات کو پھیلانے میں دلچسپی رکھنے والی ہونی چاہیے۔
ذاکر نائیک کے مطابق لڑکی ایسی ہو جو عیش و عشرت کے بغیر سادہ زندگی گزارنےکی خواہش مند ہو ، انشاءاللہ میرا بیٹا اور اس کی بیوی ایک پرسکون زندگی گزاریں گے تاہم اس کے لیے اسے آسائشوں کو اللہ کی راہ میں قربان کرنا ہوگا۔ اس کے علاوہ دو مزید شرائط ہیں جن کے مطابق لڑکی انگریزی پر عبور رکھتی ہو اور ملائیشیا میں رہنےکے لیے تیار ہو۔
ڈاکٹر ذاکرنائیک نے بہوکے لیے مزید شرائط بھی رکھی ہیں جو کہ تمام لازمی تو نہیں تاہم ان میں سے اکثر ہوں تو اچھی بات ہے۔
مزید شرائط کے مطابق لڑکی فصیح عربی بولتی ہو، مسلمانوں اور غیر مسلموں میں دعوت کا کام کرتی ہو ، اسلامیات کے کسی بھی شعبے میں بیچلر ڈگری رکھتی ہو ، قرآن کی حافظہ ہو، کسی اسلامی تنظیم میں سرگرم رہی ہو اور بڑی تعداد میں انگریزی زبان میں اسلامی اسکالرز کے بیانات سن رکھے ہوں۔
ذاکر نائیک نے پوسٹ میں اپنے بیٹے کی تفصیلات بھی بیان کی ہیں جن کے مطابق ان کے بیٹے فارق کی عمر 27 سال ہے اور اس کا قد 5 فٹ 7 انچ ہے، فارق نے سعودی عرب کی امام محمد بن سعود یونیورسٹی سے شریعہ میں بیچلر ڈگری حاصل کی ہے۔
پوسٹ میں ذاکر نائیک نے اپنے بیٹے کی دلچسپیوں ، صلاحیتوں اور سرگرمیوں کو بیان کرنے کے ساتھ اپنی اور اہلیہ سمیت بیٹی کی تفصیلات بھی شیئر کی ہیں۔