کراچی : پاکستان میں ہنڈائی نشاط نے اپنی 7 جنریشن ایلانٹرا ہائبرڈ متعارف کروادی ہے، جس کا بے صبری سے انتظار کیا جا رہا تھا۔ یہ گاڑی حال ہی میں پاکستان آٹو شو 2024 میں پیش کی گئی، جہاں کاروں کے شوقین افراد نے اس کا معائنہ کیا۔
ایلانٹرا ہائبرڈ میں 1.6 لیٹر سمارٹ اسٹریم جی ڈی آئی اٹکنسن سائیکل فور سلنڈر انجن نصب کیا گیا ہے، جو 33 کلو واٹ (43 ہارس پاور) کی طاقت پیدا کرتا ہے اور اس کا ٹارک 170 نیوٹن میٹر ہے۔ اس کا مجموعی آؤٹ پٹ 139 ہارس پاور اور 264 نیوٹن میٹر ٹارک تک پہنچتا ہے۔ گاڑی میں 1.32 کلو واٹ آور کی لیتھیم آئن بیٹری دی گئی ہے، جس کی پاور آؤٹ پٹ 42 کلو واٹ ہے۔
اس کے بیرونی ڈیزائن میں جدید فرنٹ فیشیا، پیرامیٹرک جیول پیٹرن گرل، اور ایل ای ڈی ہیڈ لائٹس شامل ہیں، جو اسے مزید دلکش بناتے ہیں۔ پیچھے ایل ای ڈی ٹیل لائٹس اس کی چوڑائی کو نمایاں کرتی ہیں۔ 16 انچ کے الائے ویلز بھی اس کے بیرونی انداز میں اضافہ کرتے ہیں۔
اس سی سیگمنٹ سیڈان کی لمبائی 4710 ملی میٹر، چوڑائی 1825 ملی میٹر، اور اونچائی 1430 ملی میٹر ہے، جبکہ اس کا ویل بیس 2720 ملی میٹر ہے۔ یہ گاڑی اپنے جدید فیچرز اور خوبصورت ڈیزائن کے ساتھ مارکیٹ میں ایک اہم اضافہ ثابت ہوگی۔