لاہور : آج رمضان المبارک کی ستائیسویں شب (شب قدر) ملک بھر میں مذہبی جوش و جذبے اور عقیدت و احترام کے ساتھ منائی جائے گی۔
شب قدر رمضان المبارک کے آخری عشرے کی طاق راتوں میں سے ایک نہایت بابرکت رات ہے، جسے ’’لیلۃ القدر‘‘ اور ’’برکت والی رات‘‘ کے نام سے یاد کیا جاتا ہے۔ اس رات کی عبادت کا ثواب ہزار مہینوں سے بہتر ہے۔
اس بابرکت رات کے موقع پر مساجد کو برقی قمقموں سے سجا دیا گیا ہے، اور مساجد میں تراویح کی نماز کے دوران قرآن کی تکمیل کی محافل منعقد ہوں گی۔ نماز تراویح میں قرآن سنانے والے حفاظ اور سامعین کو انعامات سے نوازا جائے گا اور مٹھائیاں بھی تقسیم کی جائیں گی۔
فرزندان اسلام شب بیداری کرتے ہوئے عبادات کا اہتمام کریں گے۔ خواتین اپنے گھروں میں اور مرد حضرات مساجد میں عبادات میں مشغول ہوں گے۔ اس موقع پر دین کی سربلندی، ملک و قوم کی ترقی اور سلامتی کے لیے خصوصی دعائیں کی جائیں گی۔ مساجد میں عبادت گزاروں کے لیے سحری کے انتظامات بھی کیے گئے ہیں۔
ستائیسویں شب کو مساجد میں باجماعت صلوٰۃ التسبیح ادا کی جائے گی اور انفرادی عبادات میں نفل نمازیں، قرآن کی تلاوت اور نبی کریم ﷺ کے حضور درود شریف پیش کیا جائے گا۔ اس رات لوگ اللہ تعالیٰ سے گڑگڑا کر توبہ و استغفار کریں گے اور اپنے مرحومین کے لیے دعائے مغفرت بھی کریں گے۔
