کیلیفورنیا:واٹس ایپ نے آئی فون صارفین کے لیے ایک نیا فیچر متعارف کرایا ہے جس کی مدد سے وہ ایک ہی ڈیوائس پر متعدد واٹس ایپ اکاؤنٹس کا انتظام کر سکیں گے، اور اس کے لیے انہیں مزید ڈیوائسز کی ضرورت نہیں ہوگی۔
یہ نیا فیچر ایپل کے ٹیسٹ فلائٹ بیٹا پروگرام کے ذریعے جاری کیا گیا ہے، اور جلد ہی یہ تمام آئی فون صارفین کے لیے دستیاب ہوگا۔ اس فیچر کا مقصد واٹس ایپ اکاؤنٹس کو مزید سہولت اور آسانی سے منظم کرنا ہے۔
اب تک، اضافی واٹس ایپ اکاؤنٹس کو سیٹ اپ کرنے کے لیے صارفین کو دوسرے فون نمبر یا ایک ایسا فون درکار ہوتا تھا جو ایک سے زیادہ سم کارڈز کی سپورٹ کرتا ہو، لیکن اس نئی اپ ڈیٹ کے ذریعے یہ سب کچھ ایک ہی فون پر ممکن ہوگا۔
آئی فون کے صارفین اس فیچر کے ذریعے دو مختلف طریقوں سے واٹس ایپ میں نیا اکاؤنٹ شامل کر سکیں گے۔ پہلے مرحلے میں ڈیوائس کو پرائمری اکاؤنٹ کے طور پر ترتیب دینا ہوگا، جبکہ دوسرے مرحلے میں نئے اکاؤنٹ کے لیے QR کوڈ اسکین کرنا ہوگا۔
WABetaInfo نے اس فیچر کی تصدیق کرتے ہوئے کہا ہے کہ اس اپ ڈیٹ سے اکاؤنٹس کا انتظام بہت آسان اور سہل ہو جائے گا۔
