لاہور :ملک بھر میں سردی کی لہر جاری ہے، محکمہ موسمیات کے مطابق آج رات ملک کے بیشتر علاقوں میں موسم سرد اور خشک رہے گا جبکہ پہاڑی علاقوں میں شدید سردی کا امکان ہے۔
اسلام آباد اور خیبرپختونخوا کے زیادہ تر اضلاع میں موسم سرد اور خشک رہنے کی توقع ہے، جبکہ بالائی اضلاع میں شدید سردی کا امکان ظاہر کیا گیا ہے۔
پنجاب کے زیادہ تر علاقوں میں سردی کی شدت برقرار رہے گی، مری، گلیات اور ملحقہ علاقوں میں رات اور صبح کے وقت شدید سردی ہوگی۔ خطہ پوٹھوہار میں صبح کے وقت کہر پڑ سکتی ہے جبکہ سیالکوٹ، نارووال، اور گوجرانوالہ میں ہلکی دھند کی پیشگوئی کی گئی ہے۔
بلوچستان کے بیشتر علاقوں میں موسم خشک اور سرد رہے گا، جبکہ شمالی اضلاع میں شدید سردی کا امکان ہے۔
کشمیر اور گلگت بلتستان میں موسم شدید سرد اور خشک رہنے کا امکان ہے۔
لہہ میں منفی 13، گوپس میں منفی 11، اسکردو اور استور میں منفی 10، ہنزہ میں منفی 6، جبکہ قلات اور کوئٹہ میں منفی 4 ڈگری سینٹی گریڈ ریکارڈ کیا گیا۔
