لاہور: 28 فروری 2025 کو ہمارے نظام شمسی کے 7 سیارے ایک ہی صف میں دکھائی دیں گے، جو ایک نایاب فلکیاتی منظر ہوگا۔ اس منظر میں شامل سیارے عطارد، زہرہ، مریخ، مشتری، زحل، یورینس اور نیپچون ہوں گے، اور اس کو "پلینٹ پریڈ" کہا جاتا ہے۔
رپورٹ کے مطابق، عطارد، زہرہ، مشتری اور زحل کو انسان بغیر کسی دوربین کے بھی دیکھ سکیں گے، جبکہ یورینس، مریخ اور نیپچون کو دیکھنے کے لیے ایک چھوٹی دوربین کی ضرورت ہوگی۔
یہ سیاروں کی صف بندی جنوری میں شروع ہوئی تھی، جب 21 سے 29 جنوری تک زہرہ، مریخ، مشتری، یورینس اور نیپچون آسمان پر ایک ہی قطار میں آگئے تھے۔ اب 28 فروری کو عطارد کی شمولیت سے یہ منظر اپنے عروج پر پہنچے گا۔
یہ حیرت انگیز منظر پاکستان، بھارت، امریکا، میکسیکو، کینیڈا سمیت کئی ممالک میں دیکھا جا سکے گا۔ ماہرین فلکیات کے مطابق، یہ نایاب نظارہ 15 سال بعد دوبارہ 2040 میں دیکھا جا سکے گا۔
