راولپنڈی: چیئرمین جوائنٹ چیفس آف اسٹاف کمیٹی جنرل ساحر شمشاد مرزا سے ازبکستان کے نائب وزیر دفاع میجر جنرل برخانوف احمد جمالووچ کی ملاقات ہوئی۔ ملاقات میں دونوں ممالک کے درمیان دوطرفہ دلچسپی کے امور اور علاقائی سلامتی کی صورتحال پر تفصیلی تبادلہ خیال کیا گیا۔
پاک فوج کے شعبہ تعلقات عامہ (آئی ایس پی آر) کے مطابق، ازبک نائب وزیر دفاع جوائنٹ سٹاف ہیڈکوارٹرز پہنچے جہاں انہیں مسلح افواج کے چاق و چوبند دستوں نے گارڈ آف آنر پیش کیا۔ ملاقات کے دوران دونوں فریقین نے فوجی تعلقات کو مزید مستحکم کرنے پر زور دیا اور باہمی تعاون کی اہمیت پر اتفاق کیا۔
آئی ایس پی آر کے مطابق، معزز مہمان نے پاکستان کی مسلح افواج کی پیشہ ورانہ مہارت کی تعریف کی اور دہشت گردی کے خلاف جنگ میں پاک فوج کی قربانیوں کو سراہا۔
