ریاض : سعودی حکومت نے رمضان المبارک کے دوران 45 مختلف ممالک میں قرآن مجید کے 12 لاکھ نسخے تقسیم کرنے کی منظوری دی ہے۔ سعودی خبررساں ایجنسی کے مطابق خادم الحرمین، شاہ سلمان بن عبد العزیز نے قرآن کے نسخوں کی تقسیم کے لیے یہ اہم اقدام کیا۔
سعودی پریس ایجنسی (ایس پی اے) کے مطابق قرآن مجید کے نسخوں کی تقسیم اسلامی و ثقافتی مراکز اور سعودی سفارت خانوں میں موجود مذہبی اتاشی کے دفاتر کے ذریعے کی جائے گی۔ سعودی وزیر برائے اسلامی امور، دعوت اور ارشاد شیخ ڈاکٹر عبداللطیف بن عبدالعزیز آل الشیخ نے کہا کہ یہ قرآن کے نسخے عالمی سطح پر سب سے بہترین ایڈیشنز میں سے ایک ہیں۔
شیخ عبداللطیف بن عبدالعزیز آل الشیخ نے مزید کہا کہ وزارت نے اس منصوبے کے تحت مستفید ہونے والے ممالک تک قرآن کے نسخوں کی ترسیل کی تمام تیاریاں مکمل کر لی ہیں، اور یہ کام وزارت کے ساتھ منسلک مذہبی اتاشی کے دفاتر، مراکز، اور مختلف اسلامی کونسلوں اور تنظیموں کے تعاون سے مکمل کیا جائے گا۔
