راولپنڈی : بھارتی جارحیت کے کرارے جواب دینے والے آپریشن سوئفٹ ریٹارٹ کے 6 سال مکمل ہونے پر پاک فوج کے شعبہ تعلقات عامہ (آئی ایس پی آر) نے خصوصی نغمہ "دشمناسُن" جاری کر دیا۔ یہ نغمہ 27 فروری 2019 کو ہونے والے آپریشن کی یاد میں ریلیز کیا گیا، جب پاک فضائیہ کے شاہینوں نے بھارتی جارحیت کا منہ توڑ جواب دیتے ہوئے ایک بھارتی طیارہ مار گرایا تھا اور وِنگ کمانڈر ابھی نندن کو قیدی بنایا تھا۔
نغمے کی شاعری احمد عظیم نے تحریر کی ہے، جب کہ کامران اللہ خان نے اسے گایا اور کمپوز کیا ہے۔ آئی ایس پی آر کے مطابق، اس نغمے میں وطن کے جانباز سپوتوں کی جانب سے ملکی دفاع کے لیے عہد و پیمان کا اظہار کیا گیا ہے۔
آئی ایس پی آر نے کہا کہ 27 فروری 2019 ملکی تاریخ کا ایک اہم دن ہے، جو مسلح افواج کی پیشہ ورانہ مہارت اور پاکستانی عوام کے عزم کا مظہر ہے۔ اس دن، پاک فضائیہ نے بھارتی فضائیہ کی سرحدی حدود کی خلاف ورزی کو ناکام بناتے ہوئے دو بھارتی لڑاکا طیارے مار گرائے، اور ایک بھارتی پائلٹ ابھی نندن کو گرفتار کیا۔
آئی ایس پی آر کا کہنا ہے کہ 27 فروری اس عزم کی تجدید ہے کہ ملکی خودمختاری کے خلاف کسی بھی جارحیت کا منہ توڑ جواب دیا جائے گا، اور یہ نغمہ ملک خداداد کے ہر ناپاک دشمن کے لیے ایک للکار ہے۔
