اسلام آباد : وزیراعظم پاکستان شہباز شریف نے آپریشن سوئفٹ ریٹارٹ کے 6 برس مکمل ہونے پر افواج پاکستان کی جرات و بہادری، پیشہ ورانہ صلاحیتوں اور قربانی کے جذبے کو خراج تحسین پیش کیا ہے۔ وزیراعظم نے اپنے ایک پیغام میں کہا کہ 27 فروری 2019 کو پاکستان ایئر فورس نے غیر متزلزل عزم کے ساتھ دشمن کو واضح پیغام دیا کہ پاکستان اپنی سرحدوں کی حفاظت کی بھرپور صلاحیت رکھتا ہے۔
وزیراعظم نے کہا کہ بھارت کی خطے میں جارحیت کا منہ توڑ جواب دیا گیا اور ہماری افواج نے ثابت کیا کہ پاکستان کی سلامتی کے لیے ہمارے جوان ہر دم تیار ہیں۔ شہباز شریف کا کہنا تھا کہ آپریشن سوئفٹ ریٹارٹ میں پاکستان ایئر فورس نے اپنی عسکری صلاحیتوں کا بھرپور مظاہرہ کیا، اور انہوں نے کہا کہ مجھ سمیت پوری قوم کو اپنی بہادر افواج پر بہت فخر ہے۔
وزیراعظم نے مزید کہا کہ افواج پاکستان کی ملک کی حفاظت کی خاطر کی جانے والی قربانیوں کو قوم کبھی فراموش نہیں کرسکتی اور پاکستان ہمیشہ علاقائی امن کو فروغ دینے کے لیے کوشاں رہا ہے۔ انہوں نے کہا کہ جب بھی قومی سلامتی اور استحکام پر ضرب لگانے کی کوشش کی گئی، پوری قوم سیسہ پلائی دیوار بن گئی۔
واضح رہے کہ چیئرمین جوائنٹ چیفس آف اسٹاف کمیٹی اور سروسز چیفس نے بھی اس دن اپنی مسلح افواج کو خراج تحسین پیش کیا ہے۔
