لائن آف کنڑول پربھارتی فوج کی طرف سے حملوں کا سلسلہ جاری ،آئی ایس پی آر

راولپنڈی:بھارتی فوج کی جانب سے لائن آف کنٹرول پر جنگ بندی کی خلاف ورزیاں اور اشتعال انگیزیوں کا سلسلہ جاری ، نیکرون سیکٹر پرجان بوجھ کر شہری آبادی کو نشانہ بناتے ہوئے اندھا دھند فائرنگ کردی جس کے نتیجے میں تین سالہ بچی سمیت 2 پاکستانی شہری شہید ہوگئے جب کہ 3شدید زخمی ہو ئے اور 3 گھر بھی جل گئے ۔

منگل کو پاک فوج کے شعبہ تعلقات عامہ ( آئی ایس پی آر) کے مطابق بھارتی فوج نے ایل او سی کے نیکرون سیکٹر پر جان بوجھ کر بلا اشتعال فائرنگ کرتے ہوئے شہری آبادی کو نشانہ بنایا ۔ اس دوران 45 سالہ عبدالجلیل اور 3 سالہ بچی نوشین شہید ہو گئی جب کہ 3 شہری زخمی بھی ہوئے جنہیں فوری طور پر قریبی ہسپتال منتقل کر دیا گیا ۔

آئی ایس پی آر کے مطابق بھارتی فوج کی بلا اشتعال فائرنگ کے نتیجے میں تین گھر بھی جل گئے ۔