سان فرانسسکو: اوپن اے آئی کے چیٹ جی پی ٹی میں دلچسپ فیچر متعارف کروانے کا اعلان کیا ہے جس میں چیٹ جی پی ٹی اب 'دیکھنے، سننے اور باتیں' کرنے کے قابل ہوگا۔
کمپنی کی جانب سے بلاگ پوسٹ میں کہا گیا ہے کہ آرٹیفیشل انٹیلیجنس (اے آئی) ٹیکنالوجی سے لیس چیٹ بوٹ میں بڑی اپ ڈیٹس کی گئی ہیں، جس کے بعد صارفین موبائل پر چیٹ جی پی ٹی سے گفتگو کر سکتے ہیں اور اس مقصد کے لیے 5 آوازوں میں سے کسی ایک کا انتخاب کر سکتے ہیں۔ اسی طرح صارفین چیٹ جی پی ٹی سے تصاویر شیئر کرکے اس کے مخصوص حصوں کا تجزیہ کرا سکتے ہیں۔
کمپنی کے مطابق یہ نئے فیچر ماہانہ فیس ادا کرنے والے صارفین کو آئندہ 2 ہفتوں تک دستیاب ہوں گے۔
وائس چیٹ کا آپشن آئی او ایس اور اینڈرائیڈ ڈیوائسز پر چیٹ جی پی ٹی کی ایپ تک محدود ہوگا.
کمپنی کی جانب سے کہا گیا کہ امیج پراسیسنگ کا فیچر تمام پلیٹ فارمز پر دستیاب ہوگا۔
یاد رہے کہ اوپن اے آئی نے نومبر 2022 میں چیٹ جی پی ٹی کو متعارف کرایا تھا جس کے بعد سے دنیا بھر میں کروڑوں افراد اسے استعمال کر رہے ہیں۔ چیٹ جی پی ٹی کی مقبولیت کے بعد دیگر بڑی ٹیکنالوجی کمپنیوں جیسے گوگل اور میٹا نے بھی اپنے اے آئی چیٹ بوٹس متعارف کرائے۔