اسلام آباد:فیڈرل بورڈ آف ریونیو (ایف بی آر) نے غیر ملکی سیاحوں کو عارضی طور پر گاڑیاں درآمد کرنے کی اجازت دے دی ہے، جس کی مدت تین ماہ ہوگی۔
ایک اور نوٹیفکیشن کے ذریعے ایف بی آر نے تجارتی پیمانے پر درآمد کی جانے والی اشیاء کی جانچ سے متعلق وضاحت کی ہے۔ اس نوٹیفکیشن میں کہا گیا ہے کہ تجارتی طور پر لائی جانے والی چیزوں کو کسٹمز کے قواعد کے مطابق ایڈجوکیٹنگ اتھارٹی کے حوالے کر دینا چاہیے۔
ایف بی آر کا کہنا ہے کہ اگر کوئی غیر ملکی سیاح بینک گارنٹی کے تحت کوئی گاڑی لاتا ہے تو متعلقہ کسٹم افسر اسے تین ماہ کے لیے گاڑی ملک میں رکھنے کی اجازت دے گا، اور اس گاڑی کی درآمد پر کوئی ڈیوٹی نہیں لی جائے گی۔
غیر ملکی سیاح کو یہ ضمانت بھی دینا ہوگی کہ وہ پاکستان میں قیام کے دوران اپنی گاڑی کی ملکیت کسی مقامی باشندے کے حوالے نہیں کرے گا۔ اگر تین ماہ مکمل ہونے سے پہلے سیاح محسوس کرے کہ اسے گاڑی برآمد کرنی ہے، تو اسے درخواست دینا ہوگی۔
