بلاوائیو : پاکستان اور زمبابوے کے درمیان تین میچز پر مشتمل سیریز کا دوسرا ون ڈے میچ آج بلاوائیو میں کھیلا جائے گا۔ سیریز کے پہلے میچ میں زمبابوے نے پاکستان کو 80 رنز سے شکست دی تھی، جو بارش سے متاثرہ تھا۔ یہ میچ اتوار کے روز کھیلا گیا تھا۔
پاکستانی وقت کے مطابق یہ میچ صبح ساڑھے 12 بجے شروع ہوگا۔ زمبابوے کے خلاف سیریز میں شکست سے بچنے کے لیے پاکستان کو دوسرا اور تیسرا میچ لازمی جیتنا ہوگا۔ قومی ٹیم میں 2 تبدیلیوں کا امکان ہے، جس میں اسپنر ابرار احمد اور طیب طاہر کا ڈیبیو ہو سکتا ہے، جبکہ محمد حسنین اور حسیب اللہ کو ڈراپ کیے جانے کا امکان ہے۔ گزشتہ روز پاکستانی کھلاڑیوں نے بلاوائیو میں بیٹنگ اور فیلڈنگ پر توجہ مرکوز کی تھی۔
دوسری جانب، زمبابوے کی ٹیم نے پاکستان کے خلاف پہلی فتح حاصل کرکے اپنے حوصلے بلند کر لیے ہیں اور وہ تاریخی سیریز جیتنے کے خواب دیکھ رہے ہیں۔ اس صورتحال میں پاکستان کے لیے کامیابی نہ حاصل کرنے پر بڑی رسوائی کا خطرہ منڈلا رہا ہے۔